ഫാന്‍

മണമില്ലാത്തൊരു പൂവാണേ
മധുവില്ലാത്തൊരു പൂവാണേ
മച്ചില്‍ തൂങ്ങണ പൂവാണേ
മൂവിതളുള്ളൊരു പൂവാണേ
മേലെ,പ്പൂവിതു ചുറ്റുമ്പോള്‍
മലര്‍ന്നുറങ്ങാന്‍ സുഖമാണേ

കട്ടില്‍

നാലു കാലുള്ളവന്‍
നാവനക്കാത്തവന്‍
നാമുറങ്ങീടുവാന്‍
നമ്മെ,ച്ചുമക്കുവോന്‍

ട്യൂബു ലൈറ്റ്

വെളുവെളെ മിന്നണ തീക്കട്ട
വെട്ടം തൂകണ,തീക്കട്ട

ടി. വി.

കണാ,മാട്ടം പാട്ടും കൂത്തും
ഓണക്കളികള്‍ സിനിമകളും
വേണേലല്പം വാര്‍ത്തയുമാകാം
ഓണാക്കട്ടെ ടി വി ഞാന്‍

കാറ്റ്

സ്വിച്ചിട്ടാലെന്നടുത്തോടിയെത്തും മെല്ലെ
മച്ചിലെ കാറ്റാടിപ്പൂവില്‍ നിന്നും
ഒച്ചയുണ്ടാക്കാതെന്‍ കണ്ണിമയ്ക്കുള്ളിലേ-
യ്ക്കൊച്ചിനെപ്പോലെ മയക്കമായി. 

ചിരവ

നാക്കിനു ചുറ്റും പല്ലുണ്ടേ
ഊക്കന്‍ മുക്കിലിരിപ്പുണ്ടേ
ലാക്കിനു തേങ്ങാമുറി കണ്ടാല്‍
കാക്കിരി പൂക്കിരി പൊടിയുണ്ടേ..‍

ത്രാസ്‌

പത്രോസ്സു ചേട്ടന്റെ റേഷന്‍ കടയിലെ
പാത്രങ്ങള്‍ കൊണ്ടുള്ള ത്രാസ്സു കണ്ടോ
പൊങ്ങുന്നൊരു പാത്രം താഴുന്നൊരു പാത്രം
അങ്ങോട്ടുമിങ്ങോട്ടും സൂചിയാട്ടം

കളിക്കുടുക്ക,1-15 മേയ്‌1998

തീപ്പെട്ടി

കുട്ടികളൊത്തിരി പെട്ടിയിതില്‍
മുട്ടിക്കൂടിയിരിക്കുന്നൂ
പെട്ടീം കുട്ടീം മുട്ടുമ്പോള്‍
‍കിട്ടും കിട്ടും തരി വെട്ടം.

ക്ലോക്ക്‌

ടിക്‌ ടിക്‌ ടിക്‌ ടിക്‌ മന്ത്രം ചൊല്ലും
പെട്ടിക്കുള്ളില്‍ ചുറ്റുന്നോര്‍
നീണ്ടു മെലിഞ്ഞൊരു സന്യാസി
കൂടെക്കാണും ശിഷ്യന്മാര്‍
ഒന്നൊന്നായവരോടുമ്പോള്‍
ഒപ്പം സമയം പോകുന്നു

പാവക്കുട്ടി, ഏപ്രില്‍ 1999