ഒരു വാലന്‍റയിന്‍ സ്മരണ

1

 ഈരിഴ പാറും കുറുനിര ചെറ്റൊന്നു

മാടിയൊതുക്കു,മിടതു കൈയ്യില്‍

ക്യാപ്പും പിടിച്ചു തല ചരിച്ചെന്നെ നീ

നോക്കുമ്പോഴാ മിഴി മിന്നിടുമ്പോള്‍

മുല്ലയിലോരോരോ മൊട്ടും വിരിയുന്ന

മഞ്ജു മനോഹര കാന്തിയോടെ

രാകേശനത്തെളിവാനത്തുനിന്നുകൊ-

ണ്ടെയ്യുന്ന ശോഭകള്‍ തീറെഴുതി

ആമ്പല്‍ക്കുളങ്ങളില്‍ മാരുതന്‍ മന്ദമായ്

തീര്‍ക്കും ചുഴിയൊന്നു സ്വന്തമാക്കി

ഇന്ദ്രചാപങ്ങളുരുക്കിയൊരുക്കിയി-

ട്ടിന്ദ്രിയമാകെ നീ ചാര്‍ത്തി നില്ക്കും

മന്ദസ്മിതാഭയില്‍ താരണിത്തെന്നലും

മന്ദനായ് തെല്ലിട നിന്നു പോകെ

 ചില്ലി വള,ച്ചതികോപം നടിച്ചുകൊണ്ടെ-

ന്നിലേയ്ക്കെത്തിയ നീള്‍ മിഴികള്‍

നാണമാര്‍ന്നേതോ നിഗൂഢതലങ്ങളില്‍

താണു മറയുവാന്‍ വെമ്പിടുമ്പോള്‍..

 പൂക്കുന്നൊരിച്ചെറു പുഞ്ചിരിയോടൊപ്പം

പാറുന്നു വര്‍ണ്ണങ്ങള്‍ നാലുപാടും.

2

കാലപ്രവാഹം ചിറകെട്ടി നിര്‍ത്തുന്നൊ-

രേതോ പരാക്രമമെന്നമട്ടില്‍

ഊഴിതന്‍ ശീലമാണെന്നു,മീ ഭീരുവാ-

മേഴയ്ക്കു കൈമുതലെന്ന ഭാവം

ഉള്ളില്‍ നിറച്ചുകൊണ്ടാമുടിക്കെട്ടില്‍ ഞാന്‍

ചെമ്പനീര്‍പ്പൂവൊന്നു ചൂടിടുമ്പോള്‍

പുഷ്പിച്ചിടട്ടെയെന്‍ മോഹമെന്നോര്‍ത്തു നീ-

യൊട്ടു,മനങ്ങാതിരുന്നിടുമ്പോള്‍

കണ്ണോടു കണ്ണുകളോതുന്ന കാര്യങ്ങ-

ളെന്തെന്നറിയുവാനുത്സുകരായ്

ചെഞ്ചുണ്ടു കൊഞ്ചുന്നു ചെറ്റു വിറയ്ക്കുന്നു

നെഞ്ചിടിപ്പെങ്ങും മുഴങ്ങിടുന്നൂ

പൂവില്‍ മധുബിന്ദുവൂറുന്നു ചാരത്തു

മൂളുന്നു വണ്ടൊന്നു മത്തനായി

മന്മഥനങ്ങേതോ കണാമറയത്തു

നിന്നു തൊടുക്കുന്നു പുഷ്പ ബാണം

സമ്മോദമാദരം പങ്കജം പൊയ്കയില്‍

സത്ക്കാരമേകുന്ന ഭാനു ബിംബം

ആലോലമാടും തിരകളിലൊപ്പമാ-

യാടുന്നു താമരയാകമാനം

എന്നപോലുന്മദ, മാടിയുലയുന്ന-

തെന്തിതു മാനസം രണ്ടുപേര്‍ക്കും….